Gin-athag sang 79th Infantry Battalion sang Philippine Army nga indi asset sang militar ang senior citizen nga napatay matapos gintadtad sang bala sa banwa sang Calatrava, kun sa diin gin-ako sang New People’s Army nga sila ang may kahimoan sa krimen.
Ang insidente nagluntad sa Sitio Spur 2, Brgy Minapasok, Calatrava, alas-5:45 sang hapon sang Miyerkules kun sa diin ang biktima ang ginkilala lamang nga si Alyas Tolendoy, 63 anyos, kasado, mangunguma, residente sa nasambitan nga lugar.
Yara ini sa gwa sang ila balay sang ginpa-ulanan sang bala sang apat ka armado nga persona.
Ang biktima nga nag-angkon sang 10 ka igo, nga ginalakipan sang isa ka igo sa ulo, isa sa dughan, isa sa kilid, apat sa nawala nga paa, duha sa natuo nga paa kag isa sa nawala nga tiil nga nagresulta sa iya kamatayon.
Sa interview sang Bombo Radyo Bacolod kay 1st Lt Dan Carlo Samoza, civil military officer sang 79th IB, gin-ako sang NPA nga sila ang sa likod sa pagpatay sa isa ka inosente nga sibilyan kag tanan nga indi manami ginpasibangod nila sa biktima.
Suno diri, naghambal ang NPA nga asset sang militar si Alyas Tolendoy apang paathag sini nga madugay na nga wala nagaggamit sang asset ang militar.
Ini bangod madamo na sang iban nga pamaagi para makakuha sang impormasyon kaangay sa text, sa social media kag iban pa.
Dugang pa ni Samoza, ginpakita sang NPA nga wala nila ginarespeto ang kinamatarong sang tawo kag kabuhi sang inosente.
