Kasunod sang engkwentro sa tunga sang makawala nga grupo kag katapo sang 79th Infantry Battalion sang Philippine Army sa Barangay Tamlang, Escalante City nga nagresulta sa pagkamatay ni Private First-Class John Rey Brasil, nagpagwa man sang mensahe ang New People’s Army.
Sa ginpagwa nga statement sang Roselyn Jean Pelle Command, ginpahayag sang mga ini nga nangin madinalag-on ang ila nga operasyon batok sa berdugong militar kun sa diin napatay ang isa miyembro sang mga ini nga ginkumpirmar man sang 79th Infantry Battalion, Philippine Army.
Suno pa sa statement nga ang nasambit nga madinalag-on nga operasyon ang nagapakita lamang nga sila ang may pwersa pa baliskad sa ginapahayag sang tropa sang gobyerno nga sila ang wala na sang kapasidad para sa paglunsyar sang tactical offense.
Ginpahayag man sang mga ini nga indi nila miyembro si Junril Bacalso ang naaresto sang mga otoridad matapos makuhaan sang calibre 45 pistol sa joint checkpoint operation sang Armed Forces of the Philippines kag Philippine National Police sa Brgy Mabini, Escalante City kasubong man si Joseph Bindoy nga napatay sa police operations sa Escalante City.
