Ginakalipay sang Philippine Army ang tikang nga ginhimo sang ciudad sang Bacolod matapos gindeklarar nga persona non-grata ang Communist Party of the Philippines-New People’s Army (CPP-NPA) sa ciudad.
Nahibaluan nga ang resolusyon nga gin-author ni Councilor Al Victor Espino, ang gin-aprubahan sa session sa City Council nagligad nga semana.
Sa interview sang Bombo Radyo Bacolod kay Brigadier General Benedict Arevalo, commander sang 303rd Infantry Brigade sang Philippine Army, ginpahayag sini nga ginakalipay gid nila ang ginhimo nga tikang sang Bacolod City council.
Suno diri, nagapakita lamang ini nga ang suporta sang mga local government unit (LGU) ang yara sa sa gobyerno.
Dugang pa ni Arevalo, dapat magsunod man ang iban nga mga ciudad kag munisipyo sa ginhimo sang Bacolod agud makita sang mga rebelde nga grupo nga ang LGU mismo ang nagapamuno agud matapna ang insurhensya sa ila nga lugar.
Suno pa sa 303rd IB commander, anom tubtob pito na ka LGUs sa Negros Occidental ang nagdeklarar sa CPP-NPA bilang persona non-grata.
