Nakilala na ang katapos sang New People’s Army nga napatay sa engkwentro batok sa militar sa Barangay Milagrosa, Sta. Catalina, Negros Oriental sang Huwebes sang aga.
Sa interview sang Bombo Radyo Bacolod kay 302nd Infantry Brigade Commander Brig. Gen. Joey Escanillas, ang NPA member nga napatay ang ginkilala nga si Edmar Pat Solano alias Maymay, Mimi ukon Jane, nga residente man sa banwa sang Sta. Catalina.
Ini ang ginkilala sang mga anay kaupod sini nga rebelde nga nagbalik na sa sabak sang gobyerno.
Madumduman nga nagluntad ang engkwentro matapos magreport ang mga residente nga may presensya sang rebelde nga grupo, gani nagpatigayon sang operasyon ang 11th Infantry Battalion kun sa diin ang bayluhanay sang lupok ang naglawig sang 20 minutos.
Nakasumpong sang mga ini ang ginabanta siyam nga mga remnants sang Southeast Front sang New People’s Army (NPA).
Wala naman sang nasamaran sa militar, apang ang engkwentro ang nagresulta sa pagkamatay ni Solano kag pagkarecover sang M16 rifle kag siyam ka backpacks.
Suno kay Escanillas, si Solano ang wala sang dako nga ranggo sa NPA kag ini ang ordinaryo lamang nga miyembro.
Aminado ini nga dismantled na ang Southeast front apang padayun gihapon ang recruitment activities sang mga remnants, gani padayun man ang operasyon sang mga militar agud ini ang mapunggan.
