May identity na ang napatay nga katapo sang New People’s Army (NPA) sa engkwentro nga nagluntad sa tunga sang 94th Infantry Battalion sang Philippine Army kag rebelde nga grupo sa Sitio Bugo, Barangay Buenavista, Himamaylan City, Negros Occidental sang Miyerkules sang hapon.
Madumduman nga indi magnubo sa pito ka mga rebelde ang nakaengkwentro sang militar samtang nagapatigayon ang mga ini sang combat operations kun sa diin napatay ang isa sa mga NPA samtang ang iban ang nagpalagyo naman padulong sa Cabadiangan Creek.
Sa interview sang Bombo Radyo kay Army Major Cenon Pancito III, spokesperson sang 3rd Infrantry Division sang Philippine Army, ginpaathag sini nga indi pa sang mga ini mapagwa ang pangalan sang napatay bangod Standard Operating Protocol na sang mga suldado nga mahemo lang ini kun ginkilala na ukon ginclaim na sang pamilya ang bangkay.
Apang ginpakigbahin naman ni Pancito nga ginakilala ang biktima kay Kurikoy ukon Junjun sa rebelde nga grupo.
Ini ang katapo sang Sandatahang Yunit Propaganda (SYP) Platoon sang Central Negros 2 sa Kilusang Rehiyong Negros, Cebu, Bohon at Siquijor.
Sa karun yara naman sa morgue ang lawas sang nagtaliwan nga rebelde kag ginakontak naman ang pamilya sini nga lunsay taga Negros Occidental man.
Suno kay Pancito, tuman na ka lapad asang coverage sang isa sa Regional Committee sang NPA, kun sa diin sakop na sang mga ini ang bilog nga Negros Island.
