Ginpahayag sang hepe sang Himamaylan City Police Station nga santo sa mga statements nga ginhatag sang duha ka mga wala ginhingadlan nga mga witness sa Fausto massacre, nagagwa nga katapo sang Central Negros 2 nga grupo sang New People’s Army ang isa sa mga nagpatay sa mga biktima.
Sa interview sang Bombo Radyo Bacolod kay Police Lt. Col. Reynante Jomocan, ginsecure na sa karun sang mga otoridad ang kamagulangan nga anak sang mag-asawa nga Fausto.
Suno kay Jomocan, wala pa sang napagwa nga mga affidavit sa statement sang mga witnesses bangud madamo pa sila sang ginahulat kaangay lamang sang resulta sang ballistic examination.
Ginalantaw nga kapin 15 ka mga persona ang suspetsado sa pagpatay sa mag-asawa nga Rolly kag Imelda Fausto kag ang mga menor de edad nga mga anak sang mga ini nga sanday Ben kag Rabin.
Suno kay Jomocan, ang napamana sang kamagulangan nga bata sang mag-asawa nga si Emily ang anak ni Ka Ever, ang squad leader sang isa ka platoon sang Central Negros 2.
Suno diri, ang mga tawo sa lugar ang halos miyembro kag supporter sang NPA kag ang bana ni Emily ang nagbalik na sa sabak sang gobyerno.
Ginpahayag man sini nga kun may yara sang mga encounter kag may yara sang masamaran nga miyembro sang NPA, kabahin si Emily nga naga-assist sa mga ini.
Suno pa kay Jomocan, isa sa mission kuntani ni Rolly ang pag-engganyo sa nabilin nga miyembro sang pamilya nga nagapabilin sa grupo sang hublag nga magsungka na sa gobyerno agud nga makabenepisyo sang mga proyekto sang gobyerno.
Samtang, nagpangayo naman sang assistance ang hepe sang Himamaylan City Police Station sa Himamaylan City government kun sa diin nga lugar ibutang si Emily kag ang bana sini agud nga mapadayon naman ang pagbulig sang LGU sa mga ini.
Nakasecure naman ang duha sa mga witnesses nga maghatag sang judicial affidavit bangud ang iban may yara man sang impormasyon apang lupok lamang sang armas-luthang ang nabatian sang mga ini.
Ginalantaw nga ang grupo ang may kahimuan sang krimen bangud man sa statement nga ginhatag sang ila mga relatives nga nainterview sang mga otoridad.
Nagapati naman si Jomocan nga may yara na sang progress ang ila nga ginapatigayon nga imbestigasyon sa pagpatay sa Pamilya Fausto kag kun nakahanda na ang pamilya, ipasaka naman sang mga ini ang kaso batok sa natumod nga mga suspetsado.
