Gin-ako na sang New People’s Army (NPA) nga sila ang nag-ambush sa patrol car sang Binalbagan Municipal Police Station sa Sitio Candida Dos, Brgy. Bi-ao, Binalbagan, Negros Occidental kun sa diin duha ka pulis kag isa ka sibilyan ang napilasan kahapon sang aga.
![](https://img.bomboradyo.com/bacolod/2022/02/ambush.jpg)
Santo sa ginpagwa nga statement sang Mount Cansermon Command -New People’s Army (MCC-NPA), ang ambush site ang may distansya nga kapin isa ka kilometro nagikan sa AFP forward base sa Sitio Elinita kag pila naman ka kilometro sa Philippine Army troop position sa Sitio Bulwang.
Ang pahayag ang sabat sang grupo sa Philippine National Police (PNP) nga gingamit sang administrasyon ni Duterte sa counter-insurgency operations.
Suno sa MCC-NPA, sabat man ini sa Joint Enhanced Military Operations (JEMPO) kag focused military operation (FMO) nga nagatublag sa kinamatarong kag malinong nga pagpangabuhi sang mga mamumugon kag indigeneous people sa nabukid nga bahin sang Central Negros.
![](https://img.bomboradyo.com/bacolod/2022/02/BINALBAGAN-AMBUSH-3.jpg)
Isa sa ginatudlo sang grupo amo ang sunod-sunod nga pagpang-atake nga ginpatigayon sang pwersa sang gobyerno sa ginatawag nga Oplan Sauron nga nagpatay sa masobra 20 ka mga inosente nga mangunguma sa Guihulngan City, Sta Catalina kag Manjuyod, Negros Oriental kag madamo ang illegal nga ginpriso bangud sa pato-pato nga kaso.