Bangud wala sang nagclaim nga pamilya ginpalubong nalang sang Philippine Army kag Local Government Unit ang lalaki nga gina-alegar nga katapo sang New People’s Army nga napatay sa engkwentro sa tunga sang 62nd Infantry (Unifier) Battalion, Philippine Army kag remnants sang the Communist Terrorist Groups (CTGs) sa Barangay Humay-Humay, Guihulngan City, Negros Oriental tinalikdan nga Mayo 1, 2025.
Sa interview sang Bombo Radyo Bacolod kay Captain Angelo Michael Cata-an, Civil Military Operation Officer sang 62nd Infantry (Unifier) Battalion, Philippine Army, ginbuligan sang mga ini nga mapalubong ang bangkay sang napatay nga ginkilala kay Tony Pahayahay, alyas-Aldren ukon Redol, 53-anyos kag residente sang Barangay Bulado, Guihulngan City, Negros Oriental bangud wala ginclaim sang pamilya.
Suno kay Cata-an, antes ini nga ginlubong gindala anay ini sa simbahan agud nga mamisahan kag mabendisyunan ini.
Matapos ang misa gindala nila ini sa public cemetery sang Guihulngan agud nga didto ilubong.
Natigayon nga mapalubong ang nasambit nga katapo sang NPA bangud man sa suporta nga ginhatag sang City Social Welfare and Development Office sang Guihulngan City nga ginpangunahan sang alkalde sang Local Task Force to End Local Communist Armed Conflict sang ciudad.
Nakilala ini paagi sa validated records nga ginauyatan sang Philippine Army.
Nagpanawagan man ini sa nabilin pa nga miyembro sang New People’s Army nga magbalik sa sabak sang gobyerno bangud bukas ini nga magbaton sa ila kag may gintalana nga programa nga makabulig agud makapangabuhi sila sang normal.
