Matunga ang boto sang mga miyembro sang Nationalist People’s Coalition (NPC) sa 4th District sa probinsya sang Negros Occidental sa pagpili sa duha ka aspirant sa pagka-kongresista.
Madumduman nga nagfile sang Certificate of Candidacy si Vice Governor Jeffrey Ferrer para sa pagka-Kongresista sa 4th District kasubong man nga nagfile sang COC si Engr. Lea Delfinado, anay Department of Public Works and Highways (DPWH) Region 6 Director, sa amo man nga posisyon.
Si Ferrer ang miyembro sang local partylist nga United Negros Alliance (UNEGA) kag miyembro sang National Unity Party (NUP).
Samtang, si Delfinado naman ang miyembro sang Nationalist People’s Coalition (NPC).
Suno kay Negros Occidental Governor Eugenio Jose ‘Bong’ Lacson, nga miyembro sang local party nga Love Negros kag miyembro sang NPC, nga nakahibalo ang national office sang NPC nga may yara sang alyansa ang local parties sa probinsya.
Suno diri, nagasuporta ang NPC sa local alliance sang duha ka partido.
Pahayag sang gobernador nga lauman nga sila sa Love Negros kag UnegA ang magaboto kag magasuporta kay vice governor Ferrer.
Samtang, dugang pa sini, indi man tanan nga miyembro sang NPC ang miyembro man sang local alliance kag sila ang posible nga magaboto sa challenger ni Ferrer nga amo si Delfinado.
