Arestado ang number 7 sa target priority list sang Cadiz City Police Station may kaangtanan sa iligal nga droga sa ginpatigayon nga drug buybust operation sa Palapala, Purok Bolinao B, Barangay Zone 6, Cadiz City, Negros Occidental.
Suno kay P/Lt Col. Robert Mansueto, hepe sang Cadiz City Police Station, ang suspetsado ang ginkilala kay Roque Jimenez alyas Rex, 40 anyos kag residente sang nasambitan nga lugar.
Nakuha sa iya paghinakop ang 19 tanan ka sachet sang ginasuspetsuhan shabu kalakip na ang buybust item, P500 nga mark money kag isa ka coin purse.
Ang droga nga nakuha sa suspetsado ang ginabanta nagabug-at sang 0.5 grams ukon balor P3,400.
Nahibaluan nga si Jimenez ang isa ka aktibo nga manugbaligya sang iligal nga droga sa lugar kag nagakuha sang supply sa ciudad sang Bacolod.
Ang suspetsado ang yara na sa kustodiya sang Cadiz City Police Station para sa nagakiago nga disposisyon.
