Arestado ang number 8 drug personality sang Talisay City Police Station sa buybust operation nga ginpatigayon sa National Highway, Brgy. Zone 2, Talisay City sang Nobyembre 23, alas 4:20 sang hapon.
Sa interview sang Bombo Radyo kay Police Major Jigger Gimeno, hepe sang Talisay City Police Station, madugay na nila nga target ang suspetsado nga si Dean Frederick Abillar alyas Nonoy, 41 anyos, high value individual kag residente sang Brgy. Mambulac, Silay City apang temporaryo nga nagapuyo sa Brgy. 2, ciudad sang Talisay.
Suno kay Gimeno, narecover sa paghinakop ni Abillar ang 17 tanan ka mga heat sealed transparent plastic sachet sang suspected shabu; P1,200 nga cash proceeds; P500 nga mark money kag pila ka mga drug paraphernalia.
Ang nakumpiskar nga illegal nga druga ang nagabug-at sang lima ka gramos kag may estimated market value nga P34,000.
Sa karun, nakahunong si Abillar sa Talisay City Police Station kag nakatalana nga pasakaan sang kaso nga pagbayolar sa R.A. 9165 ukon Comprehensive Dangerous Drugs Act of 2002.
Samtang, priso man ang isa ka street level individual sa Silay City sa buybust operations nga ginpatigayon sa Brgy. 3, sa nasambitan nga ciudad sang Lunes.
Sa interview sang Bombo Radyo kay Police Major Rollie Pondevilla, hepe sang Silay City Police Station, ginkilala ang suspetsado kay Rolando Florentino, 31 anyos kag residente sang Brgy. Lantad, Silay City.
Nakuha sa iya paghinakop ang duha ka elongated plastic sachet sang suspected shabu nga may kabug-aton nga isa ka gramo kag DDB value nga P6,800.
Sa karun, yara si Florentino sa kustodiya sang Silay City Police Station kag nakatalana nga pasakaan sang kaso.
