Nagpalab-ot sang reklamo ang isa ka concerned citizen nga nagpila sa gwa sang Bacolod City Health Office (CHO) agud nga magpagabot sang unto nga ginabaligya ang number agud nga makatransact sa CHO.
Sa video nga ginpadala sini sa Facebook page sang Bombo Radyo Bacolod, makita ang isa ka person with disablity (PWD) sa sulod sang compound sang CHO kag gina-alegar staff, ang nagaduhol sang numero sa isa ka lalaki kabaylo sang 20 pesos kag pila ka mga pisuson.
Suno sa tagreklamo, madugay na sila nga nagapila apang ginahambalan sila nga wala na sang number bangud nga tuman ka damo ang nagpadulong sa CHO agud nga magkuha sang medical certificate, magpa-check up ukon magpagabot sang unto.
Gin-abisuhan ang mga ini nga magbalik na lamang pagka-aga ukon sa hapon.
Apang naghulat-hulat ang amo nga concerned citizen sa paglaom nga mahatagan ini sang numero.
Samtang nagapila, natalupangdan sini ang isa ka PWD nga nagaduhol sang number sa isa ka lalaki kabaylo sang kwarta.
Suno diri, unfair lang ka tama para sa mga nagapila sang husto kag indi man husto nga pangwartahan ini sang iban.
Ginatinguhaan pa sang Bombo Radyo nga makuha ang sabat sang CHO angot sa reklamo.
