Nagdangat na sa kapin 54,000 ka mga indibidwal ang evacuees nga yara sa mga evacuation centers kasunod sa pag-erupt ni Bulkan Kanlaon.
Sa interview sang Bombo Radyo kay Raul Fernandez, director sang Office of Civil Defense- Region 6, nagapabilin nga yara sa alert level 3 ang status sang bulkan kag hugot sini nga abiso nga likawan ang bisan ano nga human activities sa 6km danger zone bangod posible nga liwat nga maglupok ang bulkan .
Suno diri, 14, 287 ka mga pamilya ukon kapin sa 54,000 ka mga indibidwal gikan sa pito ka banwa kag ciudad sa Region 6 kag 7 ang gin-evacuate.
Ang mga evacuees ang naggikan sa banwa sang La Castellana, Pontevedra, Murcia, Moises Padilla kag ciudad sang Bago kag La Carlota kag ciudad sang Canlaon sa region 7.
Nagpasalig man ini nga supisyente ang supply kag budget para sa mga biktima sang paglupok sang bulkan.
Pahayag ni Fernandez, seryuso ang sitwasyon sa karun kag para sa safety sang kada isa, sang pamilya kag sang mga responders, mas maayo nga magsunod sa mga pahanumdom kag maglikaw sa 6km danger zone.
