Nagdangat na sa 47 ang numero sang kaso sang firecrackers related incident sa Negros Island Region kag kalabanan diri biktima sang boga.
Sa interview sang Bombo Radyo Bacolod kay Department of Health – Negros Island Region (DOH-NIR) Assistant Regional Director Adrian Hort Ramos, as of today may 47 na nalukpan sa rehiyon, duha sa ciudad sang Bacolod, 30 sa probinsya sang Negros Occidental, 14 sa Negros Oriental kag isa sa probinsya sang Siquijor.
Suno diri, kalabanan sa mga biktima ang mga kabataan nga naga-edad sang 10 anyos tubtob 17 anyos.
Ang mga biktima ang nag-agom sang pilas sa ila nawong, kamot, mata kag nagkalain-lain nga bahin sang lawas.
May isa pa nga nalukpan sa kinatawo sini.
Suno kay Ramos, kalabanan sa mga biktima ang na-injured bangod sa boga kag ginasundan sang triangle.
Pahayag sini, ang ila datos ang nakabase sa data sang mga ospital.
Panawagan sini nga madamo sang magamit nga alternatibo para maggahod agud safe ang pagselebrar sang bag-ong tuig.
