Patay ang isa ka lalaki matapos nga gintiro sa Purok Little Mindanao, Hda. Salvacion, Brgy. Ayungon, syudad sang La Carlota sang Domingo, Mayo 21.
Ginkilala ang biktima kay Hernani Aginda, 44 anyos sang Brgy. Batuan sa amo man nga syudad samtang ang suspek amo si si Edgardo Molines, 62 anyos, isa ka retirado nga army kag residente naman sang Hda. Salvacion, Brgy. Ayungon, syudad sang La Carlota.
Sa interview sang Bombo Radyo Bacolod kay Police Captain Rowell Peneiro, Deputy Chief of Police sang La Carlota City Police Station, mga alas 10:00 ang takna sang gab-i sang Domingo, may nagreport sa ila nga may yara sang nagluntad nga shooting incident.
Suno kay imbestigasyon sang kapulisan, upod nga nag-inom si Aginda kag Molines kun sa diin nagluntad ang paglalisay bangud sa indi pag-intindihanay.
Nagpauli ang biktima apang nagbalik sa balay sang suspek kun sa diin may dala na nga tagad.
Suno kay Peniero, ginpanglampos sang biktima ang 3×3 nga ginagamit sa manokan sang suspek.
Gintuyo ni Aginda nga sudlon ang kusina sa balay ni Molines kag nagbuya pa sang tinaga nga wala gani ini nahadlok sa police sa army pa bangud ang suspek ang retired nga katapo sang Philippine Army.
Ginhambalan ni Molines si Aginda nga tama na kag magpauli na apang wala ini namati kun sa diin mahimo nga napuno na ang suspek nga nagresulta sa pagtiro sa biktima.
Sa karun, priso na si Molines sa custodial facility sang La Carlota City Police Station kun sa diin mangatubang sang kaso nga murder kag paglapas sa RA10591 ukon Comprehensive Firearms and Ammunition Regulation Act matapos nga wala sang ginpresentar nga papeles sang ginapanag-iyahan sini nga armas.
