Nagdangat na sa 39 ang numero sang mga barangay officials sa Western Visayas nga ginpasakaan sang kaso may kaangtanan sa ginaalegar anomaliya sa pagpanagtag sang Social Amelioration Program grants.
Sa interview sang Bombo Radyo kay P/Lt. Col. Gilbert Gorero, spokesperson ng sa Police Regional Office 6, ginpahayag sini nga ang 39 nga napasakaan sang kaso ang ginalakipan sang 11 ka mga barangay chairpersons, walo ka mga barangay kagawads, walo ka mga barangay secretaries, lima ka barangay health workers, isa ka purok leader, duha ka mga liaison officer, isa ka government social worker kag tatlo ka mga civilian.
Ang mga natungdan ang ginpasakaan sang kaso nga pagbayolar sa RA 3019 (Anti-Graft and Corrupt and Practices Act), RA 11469 (An Act Declaring the Existence of a National Emergency Arising from the Coronavirus Disease) kag RA 6713( An Act Establishing a Code of Conduct Ethical Standards for Public Officials and Employees) kag falsification of documents.
Ginpahayag man ni Gorero nga naapresyar sang Police Regional Office 6 kag Criminal Investigation and Detection Group 6 ang kaisog kag kooperasyon sang komunidad sa pagreport sang mga ginaalegar anomaliya sa pagpanagtag sang SAP sa mga barangay kag pagtindog sa kamatuoran.
Nagpanawagan man ini sa publiko nga hilway sila sa pagpadangat sang mga reklamo sa kapulisan agud maimbestigaran.
Ginpahayag man ni Gorero nga luyag lamang sini nga ipahibalo sa publiko nga ang wala sang lugar ang corruption sang tion sang pandemic.
