Sa karun, nagapabilin nga yara palang sa 20 porsyento sang populasyon sa syudad sang Bacolod ang nabakunahan na sang COVID-19 vaccine.
Suno kay Bacolod City Administrator Em Ang, Executive Director sa EOC, bangod sa manubo palang nga vaccination rollout, pahanumdom sini sa mga Bacolodnon nga kun nakabatyag na sang sintomas sang COVID-19, gilayon man nga magpacheck up.
Pahanumdom man sini nga pito ka adlaw sa isa ka semana nga bukas ang Bacolod Respiratory Outpatient (BRO) Center kun luyag magpaidalum sa swabbing.
Pinaagi sa temprano nga pagpakunsulta kag swab testing, mahimo man nga mabulong gilayon agud indi na maglala pa ang COVID-19 ang balatian kag indi na maglala pa.
Aminado naman si Ang nga sa panibag-o nga COVID-19 symptoms, makita nga hinali nalang nga nagagrabe ang mga pasyente nga maayo lang ang kahimtangan sang nakaligad nga adlaw kaangay nalang sa hinali nga kabudlayan sa pagginhawa.
Paathag man sang City Administrator nga bisan fully vaccinated na ang isa ka indibidwal dapat ipabilin gihapon ang pagsunod sa minimim health protocols.
Mas maayo naman suno diri nga magpabakuna na kun wala pa makapabakuna kag indi dapat makampante.
Dugang pa sini nga panugyan nga kun nangin close contact sa nagpositibo, dapat nga gilayon man nga magpaidalum sa swab testing.
Paathag sini nga kalabanan sang mga nagaka-ospital amo ang mga wala pa nabakunahan.
Suno kay Ang, indi paman sa karun masiling nga Delta variant ang kabangdanan sa pagsaka sang kaso sa syudad bangod ang ginabasehan amo ang clinical manifestation.
Ini kaangay nalang sang mga kaso nga tag-10 ukon tag-walo sa isa ka balay ang nagapositibo sa COVID-19 kag ang mga specimen sang mga ini ang ginapadala naman sa Philippine Genome Center.
Sa karun ginpakigbahin ni Ang nga masobra 500 na ka mga specimen samples ang napadala sang syudad para sa genome sequencing.
Samtang humalin sang Hulyo 9 tubtob Setyembre 6, yara na sa 55 ang nagbalik nga positibo sa panibag-o nga variant.
