Nagdangat na sa 140 ang numero sang mga biktima sang palupok subong nga holiday season.
Sa monitoring sang Department of Health (DOH) gikan sa 62 ka sentinel hospitals humalin sang Disyembre 21 tubtob kahapon Disyembre 30, nadugangan sang walo ka bag-o nga kaso ang mga nasamaran bangud sa palupok.
Suno sa ahensya, 95 sang mga biktima ang naga-edad 19 anyos panubo.
Pinakamadamo sa mga nasamaran ang nagikan sa palupok nga 5-star, boga kag iban pa nga wala mahibal-an nga klase sang palupok.
Ang mga narekord nga kaso sang firecracker-related injuries subong nga tuig ang 23 persyento nga mas manubo kun ipaanggid sa 182 ka kaso nga narekord sang 2024.
Samtang, ginapahanumdom liwat sang DOH sa publiko nga gilayon dal-on sa ospital kun mabiktima sang palupok ukon magtawag gilayon sa National Emergency Hotline 911 para sa emergency medical assistance.
