Aminado ang Provincial Health Office nga kaangay sang Negros Occidental, madamo pa nga probinsya nga may manubo nga vaccination rate gani nagpatigayon sang special vaccination days halin sang Abril 20 tubtub 22.
Apang sa pihak sang special vaccination days, diutay gihapon ang numero sang nagpabakuna kun ipaanggid sa target.
Suno kay Provincial Health Officer Dr. Ernell Tumimbang, 38,297 ang total nga target nga mabakunahan sa Negros Occidental sa sulod sang tatlo ka adlaw.
Ini ang ginalakipan sang 12,765 kada adlaw nga target apang 3,071 lang ang nabakunahan sang Abril 20; 3,654 sang Abril 21; kag 3,142 sang Abril 22.
Suno kay Tumimbang, ang actual nga nabakunahan ang tuman kanubo kun ipaanggid sa inadlaw nga target bangud wala gani nakalab-ot sa tunga.
Suno diri, indi lang booster doses ang ginakonsiderar nga matublukan sa vaccination days kundi pati naman ang mga kabataan nga nagaedad 12 anyos pasaka kag 5 ka tuig tubtub 11 anyos.
Sa karon, 71 porsyento na sang target eligible population sang Negros Occidental ang nabakunahan apang 54 porsyento lang ang vaccinated sa total population sang senior citizens.
Suno kay Tumimbang, nagapang-alang-alang gihapon ang mga tigulang nga magpabakuna kag kulang man ang advocacy sang gobyerno kun sa diin ginarason sang mga senior citizens nga indi na nila kinahanglan nga magpabakuna bangud wala man sila nagagwa.
