Nagdangat sa masobra singko mil ang mga fiesta goers nga nagtipon sa Bacolod City Public Plaza kagab-i, samtang ginapaabot naman sang Bacolod Police Station 1 nga magadoble pa ang numero karun sa gab-i.
Sa interview sang Bombo Radyo Bacolod kay Police Major Elmer Bonilla, station commander sa Bacolod Police Station 1, kahapon tuman ka dako ang influx sang mga naglagaw sa Bacolod City Public Plaza kun sa diin ginabanta lima ka pilo sang numero sang mga fiesta goers sang nakaligad nga mga inadlaw.
Ini bangod kagab-i ang last two nights sang Masskara Festival 2023, gani indi lamang gikan sa nagkalainlain nga Barangay sa ciudad sang Bacolod ang naglagaw subong man ang madamo nga mga bisita gikan sa iban nga probinsya kaangay sang Panay islands kag Cebu.
Nagapati si Bonilla nga madoble pa ang numero sang mga bisita nga magalagaw sa nasambitan nga festival site karun sa gab-i, ang ulihi nga adlaw sang selebrasyon.
Aminado naman ang station commander nga normal nalang ang mga magagmay nga mga kinagamo ilabi na sa bahin sang mga nakainom sang makahulubog nga ilimnon.
Suno kay Bonilla, sa karun nagafocus ang mga kapulisan agud maseguro nga zero major incidents ang Masskara Festival 2023.
Kalakip sa mga minor incidents kahapon ang isa ka foreign national nga gindala sa Bacolod Police Station 1 matapos makastiguhan.
Suno kay Bonilla magasulod kutani sa isa ka kalan-an ang foreigner apang bangod may dress code kag siya ang nakalu-ab, wala ini ginpasulod.
Bangod wala napahanugutan sa pagsulod, may ginhaboy ang foreigner sa receptionist nga nakita naman sang iban pa nga mga naka-inom naman sa area, gani ini ang ginkastigo.
Apang pasalig ni Bonilla nga ang kaso ang gamay lamang kag sarang lang mahusay sa Barangay.
