Nagsaka na sa duha ang numero sang napatay sang nabunggoan sang tanker truck ang isa ka food cart sa boulevard sa National Highway sang purok 2, brgy. Palaka, Valladolid, Negros Occidental kahapon sang hapon.
Sa interview sang Bombo Radyo kay PLt Celso Omega, deputy chief of police sang Valladolid Municipal Police Station, ginamaneho ni Dionesio Liboon Jr, 57 anyos, residente sang brgy Handumanan, Bacolod City, ang tanker truck halin sa sur padulong sa norte nga dereksyon apang samtang nagabayhe natulogan ini kag nabunggoan ang food cart kun sa diin nalapakan sang truck ang vendors nga sanday Ramilie Galinba, 36 anyos kag bata sini nga si Miko Galinba, 19 anyos kag ang 17 anyos nga si Hannah Mae Maasin nga lunsay mga residente sang purok Sampaguita, brgy. Poblacion, Valladolid.
Suno kay Omega, gilayon nga ginbawian sang kabuhi si Ramilie samtang gindala naman sa ospital sanday Miko kag Hannah Mae.
Apang, kagab-i ginbawian man sang kabuhi si Hannah Mae samtang ginabulong sa ospital.
Sa karun may inisyal na nga pag-esturyahanay si Miko kag si Dionesio apang ang pamilya naman ni Hannah Mae desidido nga magpasaka sang kaso.
Pahayag ni Omega, madamo sang mga tawo ang nagapadulong sa lugar para magbakal sang streetfoods kag maglantaw sang sunset.
Dugang pa sini, may ginapatigayon nga checkpoint sa lugar duha ka beses adlaw-adlaw, kag may yara sang nagalibot nga traffic enfrocers kag bantay dalan volunteer apang kun kaisa indi gid malikawan ang aksidente.
