Ginkumpirmar sang public relations officer sang Vallacar Transit Inc. nga nagsaka sa 18 ang kumpirmado nga napatay sa pagkahulog sang Ceres Bus number 6289 sa pil-as sa Barangay Igbucagay, Hamtic, Antique sang Martes sang hapon.
Sa interview sang Bombo Radyo Bacolod kay Jade Marquez, nagsaka na sa 18 ang kumpirmado nga patay, lima ang yara na sa estable nga kondisyon samtang may anom naman nga under observation.
Pasalig sini nga sila ang nagtukod na sang command center sa mga ospital kun sa diin gindala ang mga bangkay kag mga nasamaran.
Personal naman nga ginsuspender sang 30 ka adlaw sang Vallacar Transit Inc. ang 12 ka mga units nga kaupod sang naaksidente nga Ceres Bus samtang ginahulat pa ang desisyon sang Land Transportation Franchising and Regulatory Board (LTFRB).
Panawagan ni Seballos sa riding public nga indi magkahanga sa pagsakay sa iban nga units sang Ceres Bus bangod isolated case lamang ang natabo nga aksidente sa Hamtic, Antique.
Ginpasalig naman sini nga himuon nila ang tanan agud mabuligan ang nalisdan nga mga pamilya kasubong man ang pagpabulong sa mga yara pa sa ospital.
Nagpangayo man sang pasaylo si Seballos sa mga biktima kag sa ila nga mga pamilya samtang sila ang nagakalisod man sa wala ginakauman nga aksidente.
