Nagnubo ang mga volcanic earthquakes sa Bulkan Kanlaon suno sa pinuno sang Negros Occidental Provincial Disaster Management Program Division (PDMPD).
Sang nakaligad nga adlaw, 41 ka volcanic earthquakes ang narekord sa palibot sang Bulkang Kanlaon apang 17 volcanic quakes nalang ang narekord sa nakaligad nga 24 oras.
Ang volcanic quakes ang madetect lamang sang seismic network sang PHIVOLCS kag indi mabatyagan sang tawo.
Suno kay Dr. Zeaphard Gerhart Caelian, ang nasambit nga bulkan ang nagapabilin sa alert level 1 ukon low level of unrest sa sulod na sang kapin lima ka tuig.
Suno kay Caelian, may yara na sang contingency plan nga nakahanda ang probinsya para sa aktibidad sang bulkang kanlaon.
Suno sa PDMPD head ang mga residente malapit sa bulkang kanlaon ang gina-abisuhan nga mag-evacuate sa tion sang alert level 3 na ang bulkan.
Ang mga evacuation centers ang makita sa banwa sang Mucia kag sa Barangay Mailum kag Ilijan sa syudad sang Bago.
Nagapadayon man ang monitoring sang PDMPD sa aktibidad sang bulkan.
Liwat man sini ginpahanumdom nga wala sang makasulod sa 4km permanent danger zone sa bulkang kanlaon.
Nagpanawagan man ini sa mga pumuluyo nga magpangamuyo nga masami nga hilway ang probinsya kag mangin preparado sa tanan nga tion.
