35,801 voter-applicant pa lang ang nakaapply isa ka semana antes matapos ang voter’s registration nga magatakop sa January 31 suno sa report sang Commission on Election sa probinsya sang Negros Occidental.
Suno kay Provincial Comelec supervisor Atty. Ian Lee Ananoria, ang lone district sang Bacolod ang may pinakamataas nga numero sang mga nag-apply nga nagdangat na sa 10,318, humalin sang nag-umpisa ang voters registration.
Suno kay Ananoria, komparar sa nakaligad nga pagpangrehistro, nangin mahinay ang subong nga Enero.
Nagasunod sa syudad sang Bacolod ang syudad sang San Carlos nga may yara sang 2,484 applicants samtang ang Toboso ang may pinakamanubo nga registrants nga nagdangat lamang sa 230.
Suno sa provincial Comelec supevisor nanotisyaran sini nga mas madamo ang naga-apply para sa voters registration kun magpadulong ang mga ini sa eskwelahan para sa ila satellite registration.
Samtang, aminado man ang election officer sang Commission on Elections sa syudad sang Bacolod nga diutay gid ang nagaparehistro para sa SK and Barangay Elections nga patigayunon sa bulan sang Oktubre apisar nga nagapatigayon na ang mga ini sang voters registrations sa pila ka mga mall kasubong man sa pila ka mga barangay sa syudad.
Nagalaom si Atty. Katrina Trinio Cania, nga madamo na ang nakatapos sa pagparehistro kag indi na magdinaguso sa tion sang ulihi nga adlaw sang voters registration.
Nagaapilar man si Cania nga magpadulong sa mga malls kun sa diin nagapatigayon sang voters registration kun wala pa nakaparehistro sang temprano kag indi na paghulaton ang ulihi nga adlaw sang registration.
