Patay ang nurse nga nagabusong kag ang anum ka bulan nga lapsag nga ginadala sini matapos mabungguan sang duha ka mga pribado nga salakyan sa Purok Proper North, Barangay Taloc, Bago City, Negros Occidental, alas 9:15 kagab-i.
Sa interview sang Bombo Radyo kay Police Lt. Col. Ariel Pico, officer-in-charge sang Bago City Police Station, nagatabok sa pedestrian lane kag magapadulong kuntani sa Valladolid agud magtrabaho ang nurse nga si Maria Angela Buendia, 36-anyos, anum ka bulan nga nagabusong kag residente sang nasambit nga lugar sang hinali lamang ini nga nabungguan sang Toyota Avanza Wagon nga ginamaneho ni Philip Jansen Cantiller, 30-anyos, residente sang Deca Homes Subdivision, Barangay Cabug, Bacolod City, nga nagabyahe nagikan sur padulong norte.
Nagtabog sa pihak nga lane bahin sang highway si Buendia apang ini ang nalapakan naman sang Toyota Vios nga ginamaneho ni Salvador Castro, 59-anyos, residente sang Barangay Crossing Pulupandan, Pulupandan.
Bangud sa kakusog sang impact, nagwa sa tiyan sang biktima ang anum ka bulan sini nga lapsag.
Ginhingagaw pa ang iloy dala sa ospital apang gindeklarar nga dead on arrival.
Sa karun nakahunong sa Bago City Police Station sanday Cantiller kag Castro samtang suno kay Pico, posible nga magapasettle na lamang ang pamilya sang biktima.
