Kakulba ang rasun kun ngaa ginbalik sang kawatan ang Monstrance nga may unod nga balaan nga sakramento sa pader sang San Sebastian Cathedral.
Madumduman nga ginkawat ang Monstrance sa Adoration Chapel sang San Sebastian Cathedral sa Bacolod City alas-5:30 sang hapon sang Desyembre 30.
Sa interview sang Bombo Radyo Bacolod kay Police Major Elmer Bonilla, station commander sa Bacolod Police Station 1, ang suspetsado ang ginkilala nga si Oscar Yanson, residente sa Barangay 12, Bacolod City.
Paathag sini nga bilog nga gab-i nagpatigayon sang follow-up operation ang Bacolod Police Station 1 sang natabo ang insidente bangod may-ara man sang nakakilala sa suspetsado.
Suno diri, mismo si Most Reverend Fr. Patricio Buzon, Bishop sa Diocese of Bacolod, ang nagdonar sang monstrance, kag mga tumuluo, ang nagapanawagan sa mga kapulisan nga mabalik ang sagrado nga butang.
Apang wala gid nila ini masapwan sang Desyembre 30, kag alas-4:00 kahapon sang kaagahon, ginapahayag nga may lalaki nga nagsab-it sang isa ka jacket nga may ginaputos sa grills sang pader sang simbahan.
Yara sa sulod sang jacket ang Monstrance kag ini ang nabalik naman bulutangan, samtang ang Adoration Chapel ang temporaryo naman nga ginsarado.
Sa padayun nga pagpangita sang kapulisan sa kawatan, ini ang nasapwan sa bahin sang Barangay 12.
Nahibaluan nga ang suspetado ang ginsugiran sang iya iloy nga ini ang gina-ayam na ang kapulisan bangod sa pagpangawat, gani siya ang nahadlok kag ginbalik na lamang ang Monstrance.
Suno kay Bonilla, ang suspetsado ang masami nga nagatambay sa San Sebastian Cathedral kag mahimo nga ginpinsar sini nga mataas ang value sang Monstrance gani iya ini nga ginkawat, apang wala ini sang ihibalo nga human lamang sa saway ang sagrado nga butang.
Ang suspetsado ang wala sang iban nga trabaho, kag apisar nga wala sang record sang kaso, ini ang makapila naman nga na-imbulbar sa kinawatay apang wala napasakaan sang kaso.
Desidido naman ang simbahan nga magfile sang kaso nga theft, apang ini ang bwas pa ma-asikaso matapos ang holiday.
