Sa pagsaulog sa adlaw sang Paskwa, mensahe sang Obispo sa Diocese of Bacolod nga ligwaton naton ang pagsaulog sang paskwa subong nga tuig.
Suno kay Most Reverend Fr. Patricio Buzon, Bishop sa Diocese of Bacolod, subong nga paskwa butangan naton sang ligwa ang atun kaugalingon para sa Ginoo kag mangin maalwan.
Suno kay Buzon, dapat man nga ulikdon ang mga pigado kag pangamuyuan ang mga nagaginamo para sa kalinungan.
Suno pa diri, indi man kinahanglan nga mangin garboso ang pagsugata sang paskwa kundi ang pagbalik sa pagtuo sa mahal nga Ginoo ang nagakaigo na agud nga iselebrar ang adlaw sang paskwa.
Samtang, sa Christmas message ni Most Reverend Fr. Gerardo Alminaza, Bishop sang Diocese of San Carlos, ang atun Ginoo ang nagpakatawo agud nga tudluan kita nga mangabuhi nga Diyosnon.
Ang Ginoo ang nagdala sang paghigugma kag paghidaet apang ang kalibutan ang nagapangita sang koncreto nga paghigugma, hustisya kag paghidaet.
Nagapangay ang obisyo nga kuntani sundon sang mga katawhan ang pagtulun-an nga ginbilin sang atun nga manunubos paagi sa iya kabuhi kag sa gintudlo sa atun.
Dugang pa ni Alminaza, subong nga paskwa atun paluntaron ang paghigugmaay kag paghidaet sa mga relasyon.
Dapat man nga magtuon sa pagpamati sa kada isa, maghangod kag magpatawad kag magpakig-uli.
Suno pa diri, kabay nga kun diin ang giyera, magluntad ang paghidaet, kun diin ang pagirinaway, magluntad ang paghiliusa kag kun diin ang pagdumot kag paglain sang buot, magluntad ang paghigugma.
