Nagpanawagan ang obispo sang Diocese of Bacolod sa mga katoliko nga pangamuyuan ang mga frontliners nga nagasakripisyo agud mahatagan sang kahilwayan ang pungsod batok sa coronavirus disease 2019 (COVID-19).
Sa misa nga ginpatigayon kaina sang aga paagi sa live streaming kag radyo, nagpanugyan si Bishop Patricio Buzon sa mga pumuluyo nga pangamuyuan ang mga doctors, nurses, health workers, volunteers kag iban pa nga mga frontliners nga tatapan ang mga ini sang Ginoo bangud indi basta-basta ang ila nga gina-ubra.
Suno kay Buzon, dako ang pasalamatan sang mga tawo sa mga frontliners bangud ginarisgo sang mga ini ang ila nga kabuhi agud luwason ang iban.
Gani suno sa iya, kinahanglan nga dal-on ang mga ini sa pagpangamuyo bangud indi nila makita ang virus nga ila ginakontra.
Nagpasalamat man ini sa mga frontliners bangud sa pagsakripisyo nga ila ginaubra agud mahatagan sang kahilwayan ang pungsod.
Gin-anggid man ini sang obispo sa pagsakripisyo sang Ginoo nga apisar kamatayon ang nagakadapat sa katawhan bangud sang sala, nagpanginmatay Ini gihapon agud makaangkon ang tanan sang wala katapusan nga kabuhi kaupod Niya.
