Kadungan sang pagsaulog sang All Souls Day subong nga adlaw Nobyembre 2, naghatag sang mensahe sang paghiliusa ang obispo sang Diocese of San Carlos.
Sa mensahe ni Bishop Gerardo Alminaza, ginpalab-ot sini ang iya pagbuylog, pag-upod, paghatag sang katahuran, pag-ampo kag pagpahanumdom nga makahuluganon gihapon sa atun kabuhi ang mga pinalangga natun nga minatay.
Suno sa obispo, ang karun nga All Souls Day, ang adlaw nga ginahatag para sa pagpangamuyo ukon intercession sa mga nagtaliwan na natun nga pinalangga sa kabuhi.
Ini ang pahanumdom nga sila ang wala natun ginakalipatan kag kabahin gihapon sa atun nga pagpanglakaton.
Bangod sini, panugyan ni Bishop Alminaza nga padayun natun nga i-ampo ang kapahuwayan sang mga kalag nga dalayon.
Dugang pa sini nga ginadumdom man ang mga kalag nga yara sa purgatoryo kag nakalimtan na sang ila nga mga himata, bangod sila ang nagakinahanglan man sang pagtabang kag pagpangamuyo.
Paathag ni Alminaza nga ini ang pagpakita nga sila ang isa sa katilingban kag kita ang nagakabalaka sa isa kag isa, gani nagabuligay, nagasakdaganay, kag wala ginakalipatan ang kaangtanan sa kada isa bilang isa ka lawas ni Kristo.
Pahanumdom sang obispo nga ang simbahan ang nagatudlo nga may kabuhi nga wala sang katapusan, gani dapat nga i-apelar nga nga sa kaluoy sang Ginoo, mapatawad sa mga kasal-anan ang mga nagtaliwan na, agud sila ang mangin putli kag nagakaangay nga makaagom sang kabuhi nga wala sang katapusan, maangkon ang kalipay upod sa pinalangga nga Amay sa langit kag ang Ginoong Hesu Kristo nga manunubos sang tanan.
Ang practice sa pagsaulog sang All Souls Day ang nakasandig sa atun pagsalig sa wala katapusan nga kaluoy sang Diyos, nga magapatawan sa mga pinalangga natun nga minatay.
