Nagpanawagan ang obispo sang Diocese of San Carlos diri sa Negros Occidental nga maghugpong sa pagpangamuyo sa pagprotekta sa Pilipinas sa indi manami nga mga impluwensya ilabi na sa nagadala sang ideolohiya nga nagabaton sang sala.
Sa interview sang Bombo Radyo Bacolod kay Bishop Gerardo Alminaza, insakto ang ginpagwa nga pastoral letter ni Lingayen-Dagupan Archbishop Socrates Villegas nga may yara sang pagpamahog sa seguridad sang Pilipinas.
Suno diri, bisan sin-o nga Pilipino nga nagakabalaka sa pungsod, ang magakwestyon sa nagakatabo sa karun.
Para kay Alminaza, may kinamatarong ang mga Pilipino nga maggamit sang dunang manggad nga ginbugay sang Diyos nga gina-angkon sang Pilipinas.
Dugang pa sini, kwestyonable ang mga institusyon nga ginapatindog nga nagahimo sang wala nahibaluan nga mga aktibidad kasubong man nga kun paano nga may identity sa Pilipinas ang tawo nga indi Pilipino.
Panawagan sang obispo sa Diocese of San Carlos City, dapat nga ipakita ang pagpamatok sa mga sala kag mangisog sa pagtilaw paagi sa pagpangamuyo para sa proteksyon sang Pilipinas kag tagsa ka mga Pilipino.
