Nahawanan na sang Bacolod City Legal Enforment Unit ang area sa Education and Training Center School II (ETCS II).
Madumduman nga ginhatagan sang Notice to Vacate ang mga tag-iya sang mga kapehan kag balaligyaan nga nangin obstruction sa dalan nga maghalin na sa lugar.
Sa interview sang Bombo Radyo Bacolod kay Retired Police Colonel Levy Pangue, pinuno sang Bacolod City Legal Enforment Unit, napangkakas na ang obstruction sa dalan nga nagatuga sang traffic sa atubang sang buluthuan.
Suno diri, kapin sa 14 ka vendors ang ginhatagan sang warning kag sila man ang nagpanghimos sang ila mga stalls kag ang City Legal Enforment Unit na lang ang nagpanghimos sang mga bilin.
Suno kay Pangue, indi pwede makaparkig sa school zone bangod nagagutok ang dalan kag delikado sa mga estudyante nga nagagwa kag sulod sa buluthuan. Samtang, wala sang problema sa mga naga-negosyo sa kilid dalan sang Lopez-Jaena St sa Brgy 27, Bacolod City.
Suno kay Jerry Tana, tag-iya sang furniture shop, 21 ka tuig na siya nga naga-negosyo sa lugar kag wala man sang problema sa iya kun gin-idog ang ila mga shop.
Apang nangin emosyonal si Tana bangod suno diri ini na lamang ang ginakuhaan niya sang palangabuhian kag may bata pa ini kag apo nga ginasagod.
Suno pa sa iya, ini lang man ang nahibaluan niya nga palangabuhian sa tunga sang kapigaduhon.
Pahayag ni Tana, naga-appeal sila sa Barangay nga kun tani hatagan sila sang 5 feet nga kalaparon sang area halin sa linya sa dalan agud bisan papaano may lugar pa sila para makapadayon sang ila palangabuhian.
