Nagdangat na sa 70 porsyento ang occupancy rate sang mga hotels sa ciudad sang Bacolod sa una nga semana sang Masskara Festival 2023.
Sa interview sang Bombo Radyo Bacolod kay Bacolod City Councilor Jason Villarosa, chairperson sa Committee on Tourism sa Sangguniang Panlungsod, sila ang nagpatigayon sang meeting kaupod sa Bacolod Yuhum Foundation kag Bacolod City Tourism Office agud diskusyunan ang epekto sa ekonomiya sa una nga semana sang pagsaulod sang kapiestahan.
Ang pag-angkon sang 70 porsyento nga occupancy rates sang mga hotal kag restaurants sa ciudad ang nagapakita lamang nga nagaganar sang popularidad ang Bacolod Masskara Festival nga nagacontribute naman sa pag-uswag sang ekonomiya sa Bacolod City.
Ilabi na nga sa pagdako sang bookings sa mga hotels kag sa pagdamo sang customers sa mga restaurants, may mga tinion man nga nagakinahanglan ang tagsa ka mga negosyo sang dugang nga manpower.
Bisan temporaryo lamang, nakita nga ini ang makahatag sang dugang nga income sa mga pumuluyo, kag mangin adisyunal pa nga public spending.// Kaupod man nila sa meeting ang Hotels and Restaurant Association of Negros Occidental.
Suno kay Villarosa, ginalauman nga sa ulihi nga semana sang selebrasyon, mapuno na ang mga hotel accomodations ilabi na nga ang iban ang temprano pa nga nagpabook sang mga kwarto sa plano nga pagbisita sa highlights sang kapiestahan.
Bangod sini nakita nila nga madamo man sang makabenepisyo nga mga negosyo sa probinsya sang Negros Occidental.
Paathag ni Villarosa, nga sa tion nga puno na ang hotel accomodations sa ciudad sang Bacolod, ang iban nga mga Masskara goers ang magabook sang hotels sa mga ciudad ukon banwa sa Negros Occidental nga mahapos ang access sa Bacolod City.
Bangod sini positibo si Villarosa nga indi lamang ekonomiya sa Bacolod City ang magasanyog bangod sa Masskara Festival 2023, kasubong man ang pila ka negosyo sa probinsya.
