Ginapahangop sang Office of Civil Defense – Negros Island Region nga indi pa gihapon mapabalik ang mga evacuees sang Bulkan Kanlaon bangod padayun pa ang mga volcanic activities.
Sa interview sang Bombo Radyo Bacolod kay Office of Civil Defense – Negros Island Region Director Donato Sermeno III, kahapon, may pito ka narecord nga ash emission sa bulkan.
Dugang pa sini nga nagapabilin pa sa Alert Level 3 ang status sang Bulkan gani 6km Extended Danger Zone gihapon ang indi pwede matiniran.
Ginapakamaayo na lamang sini nga sa pagtsekyar sang incident management team, nakita nga wala nagtupa ang abo kahapon sa mga area nga masami nagakaapektuhan bangod ang ashfall ang nagtupa sa ibabaw.
Suno diri, ginahulat nalang nila sa OCD nga maglu-ad sang lava ang Bulkan Kanlaon, agud matapos na bangod pinaagi sini mapahagan-hagan man ang pressure sa sulod sang bulkan kag indi na mag-alburuto.
Abiso sini nga indi gid anay pabalikon ang mga residente sa pagpuyo sa sulod sang 6km Extended Danger Zone bangod target nila ang zero casualties, kag indi nila luyag nga may binasulay sa ulihi.
Luyag man sang OCD-NIR makabatun sang accurate nga datos sang mahimo numero sang mangin evacuees sa tion nga magsaka sa Alert Level 4 ang Bulkan agud mabanta sa capacity sang hamtangan nga evacuation centers.
Sa karun, kumpleto na ang pagtukod sang Tent City sa Himamaylan, apang wala pa sang mga hapin sa idalom samtang sila ang nagapadala man sang mga tents sa Pontevedra, San Carlos kag Bago City.
Ini ang ginapangitaan naman sang lugar nga safe, agud maseguro nga indi mauyang ang effort sa ginabaha nga lugar.
