Ginpangunahan sang Vice Chairperson sang Regional Task Force Kanlaon kag Office of Civil Defense – Negros Island Region Director ang site inspection kaupod ang mga tiglawas sang magkatuhay nga mga national government agencies nga ginalakipan sang Department of Social Welfare and Development (DSWD), Department of the Interior and Local Government (DILG), Commission on Elections (COMELEC), Department of Health (DOH), kasubong Department of Public Works and Highways (DPWH).
Sa interview sang Bombo Radyo Bacolod kay OCD Negros Island Region Director Donato Sermeno, nagpatigayon sila site inspection sa tent city nga ginpahamtang sa Barangay 3, Himamaylan City, Negros Occidental sang Biyernes, Enero 17.
Suno kay Sermeno, magluwas sa site inspection nagpatigayon man sila sang meeting kaupod ang mga nagkalain-lain nga ahensya sang gobyerno.
Suno diri, sa ila nga paglibot, personal nila nga nakita kun ano ang kinahanglanon sa patindugon nga tent city kag nameetingan naman sang mga ini ang paglay-out para sa lighting kag water system.
Nagrequest man ang mga ini sang dugang nga basin para sa public toilets.
Nagrequest man sila sang ground sheet gikan OCD Central para sa ground protection.
Kinahanglanon nga masiguro ang ground protection agud nga magamit ang ground nga mahapinan kag makatulog ang mga evacuees bangud kun maggamit sang folding bed, malimitahan ang space sang tents.
Ginpasiguro man sang 5th District Supervisor sang Department of Education nga may yara na sila sang nahanda nga contingency plan sa mga estudyante nga madisplace agud masiguro nga magapadayon ang ila nga pagtuon.
Aminado man ang NIR OCD director nga madamo pa sang kinahanglanon para sa patindugon nga tent city.
Ang tent city ang magaserbe nga butangan sang mga evacuees nga indi makaigo sa evacuation centers pananglitan nga magsaka sa Alert Level 4 ang bulkan Kanlaon.
