Ginlibot sang gindesignar nga director sang Office of the Civil Defense – Negros Island Region ang mga Local Government Units sa Negros Occidental nga apektado sang unrest activities sang Bulkan Kanlaon.
Nahibaluan nga gindesignar nga direktor sang OCD-NIR si Donato Sermeno III.
Siya ang nagikan sa Sibalum, Antique kag madugay naman sa public service kun sa diin nagserbe nga Municipal Administrator sa Taytay, Palawan kag nagserbe man sa Antique samtang sang Agosto gintanyagan ini nga mangin OCD Director sang NIR kun sa diin nagpungko ini sang Oktubre 17.
Kaupod si OCD Western Visayas Regional Director Raul Fernandez ginpadulungan nanday Sermeno ang banwa sang La Castellana, ciudad sang La Carlota kag iban pa nga LGU nga apektado sang unrest activities sang Bulkan Kanlaon agud lantawon ang sitwasyon sang mga residente.
Suno kay Sermeno nga isa sa mando sang national office sang OCD nga dapat monitoron gid ang kahimtangan sang mga pumuluyo sa mga lugar nga nakapalibot sa nasambit nga bulkan.
Ginpahayag man sang director nga wala pa sila sang nabaton nga reports nagikan sa mga LGUs nga malala na ang epekto sang abo nagikan sa Bulkan Kanlaon sa mga residente.
Indi paman full operational ang opisina sang Office of the Civil Defense – Negros Island Region bangud indi pa kumpleto ang mga personnel sini.
Ginabuligan man sang director sang OCD Western Visayas si Sermeno agud nga mafamiliarize ang lugar.
Sa karun yara ang OCD NIR sa transistion period kag plano sang mga ini nga magkuha sang personnel nagikan sa OCD Western Visayas kasubong man sa OCD Central Visayas.
Ginpahayag man nga ang problema sa karun amo ang budget para sa OCD-NIR nga amo man ang problema sang tanan nga regional officer sang national agencies sang gobyerno para sa Negros Island Region.
