Ginpahayag sang Regional Director sang Office of the Civil Defense – Negros Island Region nga wala pa sang evacuation order karun nga nagapabilin sa alert level 2 ang status ng Bulkan Kanlaon.
Ini kasunod sang nagluntad nga minor explosive eruption alas-8:08 kagabi.
Sa interview sang Bombo Radyo Bacolod kay OCD-NIR Director Donato Sermeno III, 13 ka Barangay sa Negros Occidental ang nagreport nga nakaeksperyensya sang ashfall ukon nakapanimaho sang asupre.
Ini ginalakipan sang Bago City, San Carlos City, La Carlota City, Bacolod City kag banwa sang La Castellana.
Suno kay Sermeno, ang ahensya ang nagabase sa mga advisories sang Philippine Institute of Volcanology and Seismology (Phivolcs).
Bangod nagapabilin sa Alert Level 2 ang status sang Bulkan, wala sang ginpatigayon nga evacuation sa extended danger zone.
Ginadumilian naman ang aktibidad sa sulod sang 4km permanent danger zone.
Apang suno kay Sermeno, wala na sang nagapuyo sa sulod sang 4km permanent danger zone, bangod ang 109 ka mga pumuluyo sa lugar ang wala na ginpabalik humalin sang mga nagligad nga paglupok sang bulkan kag sila ang ginpatinir lamang sa mga evacuation centers.
Apisar sini, padayun ang monitoring sang OCD kag preparasyon sang mga local government units kag mga ahensya sang gobyerno inkaso kinahanglanon ang pagpabakwit sa mga residente.
