Nagpatigayon sang ocular inspection ang pamunuan sang Office of the Civil Defense – Negros Island Region sa ciudad sang Himamaylan kun sa diin ginatukod ang tent city sang Biyernes, Enero 17.
Sa interview sang Bombo Radyo Bacolod kay OCD – NIR Director Donato Sermeno, magluwas sa ocular inspection,nagpatigayon man sila sang inter-agency coordinating meeting kag ginplastar sang mga ini ang mapa sa ginapatindog nga tent city.
Suno kay Sermeno, present sa ginpatigayon nga ocular inspection ang representatives sang nagkalain-lain nga national agencies.
Isa diri ang Department of Social Welfare and Development (DSWD) nga nagtumod sang mga suitable areas kag mga structures nga dapat ibutang kaangay sang Child Friendly spaces.
Ang Department of Health ang nagtumod man sang lugar nga butangan sang portalets kag ang Department of Public Works and Highways (DPWH) nga ginrequest sang OCD nga magseguro sang ground improvement, kasubong man ang kuhaan sang supply sang tubig kag kuryente.
Ginalantaw man ang paggamit sang solar lights sa mga tents agud nga makakinot sa kuryente.
Inisyal naman nga nagpahayag ang Himamaylan City government nga sila ang magapatigayon sang pagtakod sang linya sang kuryente.
Sa tion nga magsaka sa Alert Level 4 ang Bulkan Kanlaon, kag indi mag-igo sa Tent City ang mga evacuees, ang ciudad sang Kabankalan, Panaad Park and Stadium sa ciudad sang Bacolod kag mga banwa kag ciudad sa nabilin nga bahin sang Northern Negros Occidental ang una naman nga nagkomiter nga sila ang sarang mag-akomodar sang mga displaced individuals.
