Magapatigayon sang aerial drone survey ang Office of the Civil Defense – Negros Island Region sa ibabaw nga bahin sang Bulkan Kanlaon agud matsekyar kun may nagakahuman nga artificial dam.
Ini kasunod sang pagdaludo sang lahar kag mud flows gikan sa ibabaw sang bulkan nga nagpa-awas sa pila ka mga sapa sa banwa sang La Castellana matapos sang pagbubo sang madamol nga ulan.
Sa interview sang Bombo Radyo Bacolod kay OCD-NIR Director Donato Sermeno III, ginakahangaw-an nila nga matabo ang kaangay sa flashflood sa Nepal.
Suno diri, bangod may mga bato kag kahoy nga nagakadala sa pag-ilig sang tubig nga may mga abo gikan sa Bulkan, yara ang posibilidad nga ini ang nagasupon kag nagahuman sang artificial dam.
Apang sa pagkasupot sang tubig, ang nagbalabag nga mga debris ang mahimo nga magcollapse ano man nga oras, kag makatuga sang mas mabaskog nga bulyada sang tubig panaog, kaangay sa natabo nga trahedya sa Nepal.
Magakoordinar ang OCD-NIR sa Mines and Geosciences Bureau (MGB) nga may-ara sang equipment kag operator para sa aerial drone survey, kasubong man sa Provincial Government kag mga concerned agencies.
Pinaagi sini, mahimo matapna ang mas malala nga kahalitan ilabi na nga may mga nagaka-eksperyensyahan nga madamol nga mga pag-ulan sa pila ka lugar sa probinsya.
Nahibaluan nga luwas sa natabo nga mud flow kag lahar flow sa La Castellana sang Martes sang gab-i, nangin mabaskog man ang pag-ulan sa banwa sang Hinobaan subong nga adlaw, gani nagdeklarar si Hinobaan Mayor Daph Reliquias sang kanselasyon sang klase subong nga hapon.
