Liwat nga naghatag sang mga pahanumdom ang Office of the Civil Defense-Negros Island Region matapos ang pagtay-og sang 7.4 magnitude nga linog sa Davao Region kahapon sang aga.
Sa interview sang Bombo Radyo Bacolod kay Office of Civil Defense – Negros Island Region Director Donato Sermeno, indi man malikawan bangud indi man mapaktan ang pagluntad sang linog gani ang dapat nga himuon tsekyaron kun ang lugar nga nahamtangan ang prone sa earthquake hazards.
Suno kay Sermeno, sa tagsa nga may announcement sang linog, ang mga nagapuyo sa higad sang dagat ang dapat nga mag-alisto.
Suno diri, kun may ipagwa ang Philippine Institute of Volcanology and Seismology (PHIVOLCS) nga tsunami warning pagkatapos sang linog, dapat nga magsaka na gilayon sa matag-as nga lugar.
Kahapon wala man malakip ang Negros Island Region sa tsunami warning.
