Nagapakig-angot na sa mga concerned agencies ang Office of the Civil Defense – Negros Island Region agud mapreparahan ang mahimo nga epekto sang ginapaabot nga Super El Niño.
Sa interview sang Bombo Radyo Bacolod kay OCD-NIR Spokesperson Mylene Gonzaga, sila ang nagpatigayon na sang 3rd Quarter Full Council Meeting bilang preparasyon sa Super El Niño nga magasugod subong nga 4th quarter, kag magadugay tubtob pa sa 1st quarter sang 2027.
Ang OCD-NIR ang nagakoordinar man sa Philippine Atmospheric, Geophysical and Astronomical Services Administration (PAGASA), nga una na nga nag-anunsyar nga maga-epekto ang Super El Niño sa tropical pacific, lakip na sa Pilipinas.
Kaupod sa gintukod nga Task Force El Niño, sila ang nagakoordinar na sa Department of Agriculture para sa pagbulig sa mahimo maapektuhan nga mga mangunguma.
Ini bangod ginakahangaw-an nga magapanubo sa water levels sa mga water sources kaangay sang surface kag ground waters ang tuman nga ka-init.
Kasubong man sa Department of Social Welfare and Development para sa bulig naman sa mga mahimo madulaan sang palangabuhian.
Kalakip sa mga ginalantaw nga maapektuhan luwas sa mga pananom, ang mga kasapatan, kag tawo.
Samtang sa pagnubo sang produksyon, ginakahangaw-an man ang pagmahal sang mga produkto.
Sa karun, amat-amat na nila nga ginapreparahan nga mapahagan-hagan ang mangin epekto sang Super El Niño.
