Ginkumpirmar sang Regional Director sang Office of the Civil Defense – Negros Island Region nga may iban pa nga mga site nga ginpropose sa ila nga mahamtangan sang permanent relocation site sang mga Kanlaon evacuees gikan sa banwa sang La Castellana.
Sa interview sang Bombo Radyo Bacolod kay OCD-NIR Director Donato Sermeno III, magluwas sa gindonar nga duta sa Barangay Manghanoy, La Castellana nga wala gin-aprubahan sang Mines and Geosciences Bureau (MGB) may iban pa nga ginsumiter nga areas nga ginpakadtuan naman nila sa technical working group.
Nahibaluan nga ang una nga area, nga sayluhan kuntani sang 35 ka pamilya nga nagapuyo sa sulod sang 4km Permanent Danger Zone sang Bulkan kanlaon ang wala gin-aprubahan bangod malapit sa sanitary landfill sang banwa.
Suno kay Sermeno, ginavalidate man sang Philippine Institute of Volcanology and Seismology (Phivolcs) ang area, kag ginahulat pa nila kun ang mga ini ang makapasar.
Apang hinali nga indi makapasar, pahayag sini nga sila ang liwat magapangita sang iban pa nga lokasyon.
Samtang aminado si Sermeno nga nakapoy na ang mga Internally Displaced Persons (IDPs) sa evacuation center, gani agud nga indi madepress, nagapatigayon man sang nanarisari nga aktibidad ang lokal nga gobyerno kag pila ka mga ahensya.
Kalakip diri ang sports activity sang La Castellana Government, ang Department of Social Welfare and Development (DSWD) ang may-ara man aktibidad samtang may livelihood projects naman sa La Carlota City, nga makahatag man sang dugang nga income sa mga evacuees.
