Nagbisita sa ciudad sang La Carlota si Office of the Civil Defense Undersecretary Ariel Nepomuceno agud tsekyaron ang sitwasyon kasunod sang paglupok sang Bulkan Kanlaon.
Sa interview sang Bombo Radyo Bacolod kay La Carlota City Mayor Rex Jalando-on, gindiskusyunan nila ang mga long term plans kag ginpalab-ot man sini ang commitment sa pagbulig ni President Ferdinand “Bongbong” Marcos Jr. sa kun ano pa ang sarang mahimo.
Sa karun padayun ang ila water rationing sang mainom nga tubig kag mga magamit sang household kaangay sang pagpaligo kag pagpanglaba.
Bangod indi makasustiner ang ila water filtration unit kag firetrucks, sila ang nagapangayo man sang bulig sa iban nga mga banwa kag ciudad kag sa provincial government.
Sa pihak nga bahin, Wala sang may narekord nga ash emission sa bulkan Kanlaon matapos ang nagluntad nga minor explosive eruption sng Abril 8 tubtob sa karun.
Sa interview sang Bombo Radyo Bacolod kay Pearly Sianson, Science Research Specialist sang Kanlaon Volcano Observatory, santo sa 24 oras nga monitoring, may narekord nga 12 ka volcanic earthquakes kun sa diin nagdangay sa 2202 tonnes per day ang ginbuga nga sulfur dioxide kag ang plume may yara sang kaatason nga 200 meters samtang nagapadayon ang degassing.
Suno diri, wala pa man sang may narekord nga ash emission halin sang Miyerkules tubtob sa karun.
Sa karun nagapabilin sa alert level 3 ang status sang bulkan.
