Nagpagwa ang Office of Civil Defense sang pyroclastic density currents ukon PDC alert sa lima ka mga banwa kag ciudad sa probinsya sang Negros Occidental.
Ginpaandaman ang mga pila ka barangay sa banwa sang La Castellana, Pontevedra, Moises Padilla, La Carlota City kag Bago City.
Ang PDC naga tumod sa mainit nga flow sang volcanic ash, gas, kag debris nga tuman ka dasig kag labing makahalalit.
Sa La Castellana siyam ka mga barangay ang nalakip sa PDC hazard, apat sa Moises Padilla naman, tatlo La Carlota City kag duha sa Bago City.
Suno sa OCD ini nga mga barangay ang delikado kag mahimo maigo sang pyroclastic flow sa tion nga liwat nga maglupok ang bulkan Kanlaon.
Gina abisuhan ang publiko nga dapat mangin alerto kag magsunod sa otoridad ilabi na nga naga pabilin ang pamahog sang paglupok sang bulkan Kanlaon.
Ang Bulkan Kanlaon ang nagapabilin sa Alert Level 3 kun sa diin wala sang ginapahanugutan nga human activity sa sulod sang 6km extended danger zone sang Bulkan Kanlaon.
Samtang amat amat naman nga gina-install ang mga tents sa tents City kun sa diin butangan sang mga evacuees nga indi makaigo sa evacuation centers sa tion nga magsaka sa Alert Level 4 ang Bulkan Kanlaon.
