Nagpatigayon na sang ocular inspection ang pamunuan sang Office of the Civil Defense-Negros Island Region sa ciudad sang Himamaylan kun sa diin ipahamtang ang tent city sang Biyernes, Enero 17.
Sa interview sang Bombo Radyo Bacolod kay OCD NIR Director Donato Sermeno, magluwas sa ocular inspection,nagpatigayon man sila sang inter-agency coordinating meeting kag ginplastar sang mga ini ang mapa sa ginapatindog nga tent city.
Suno kay Sermeno, present sa ginpatigayon nga ocular inspection ang nagkalain-lain nga national agencies.
Isa diri ang Department of Social Welfare and Development (DSWD) nga nagtumod sang mga suitable areas, mga structures nga dapat ibutang kaangay sang Child Friendly spaces.
Ang Department of Health ang nagtumod man sang lugar nga ibutangan sang portalets kag ang Department of Public Works and Highways (DPWH) kun sa diin nagrequest ang OCD sa mga ini sang ground improvement, kasubong man ang kuhaan sang supply sang tubig kag ang supply sang kuryente.
Ginalantaw man ang paggamit sang solar lights sa mga tents agud nga makakinot man sa kuryente.
Inisyal naman nga nagpahayag ang Himamaylan City government nga ang mga ini ang magapatigayon sa pagtakod sang linya sang kuryente.
Suno kay Sermeno, sa ila inisyal nga pagbanta ang maakomodar sang tent city amo ang masobra sa isa ka libo ka mga indibidwal santo man sa inisyal nga ginpahayag sang Himamaylan City.
Sa tion nga magsaka sa Alert Level 4 ang Bulkan Kanlaon, kag indi mag-igo sa Himamaylan City ang mga evacuees, ang ciudad sang Kabankalan, Panaad Park and Stadium sa ciudad sang Bacolod kag nabilin nga bahin sang Norte nga bahin sang Negros Occidental ang una naman nga nagpahayag nga mahimo ang mga ini mag-akomodar sang mga displaced individuals.
