Bisan wala sang storm warning signal nga ginpasaka sa Western Visayas, nagapanugyan ang pinuno sang Disaster Risk Reduction and Management Division sang Office of the Civil Defense Region 6 sa publiko nga magpanghanda kag mag-aligmat sa Bagyong Rolly.
Sa interview sang Bombo Radyo Bacolod kay Aletha Nogra, DRRM division chief sang OCD-6, ginpahayag sini nga bisan yara sa babaw nga bahin sang pungsod ang tract sang bagyo, ginpahanumdom sini nga naga-eksperyensya gihapon ang Region 6 sang southwest monsoon kag may yara pa sang weak to moderate La Niña nga posible maka-tuga sang madamol nga pag-ulan kag makaresulta sang pagtiphag sang duta kag pagbaha.
Suno kay Nogra, naka-red alert status na ang OCD-6 humalin pa sang Marso bangud sa COVID-19 pandemic.
Nagakahulugan lamang nga naka-activate ang highest level of coordination subong man ang response clusters sa rehiyon.
Dugang pa sini nga dapat magsugod man ang pagpanghanda sa kaugalingon nga panimalay tubtob sa barangay ilabi na sa mga landslide, flashflood kag storm surge prone areas.
Sa karon ginapatumod na sang OCD-6 sa mga local DRRM offices ang mga evacuation centers nga sarang magamit inkaso nga kinahanglanon.
Nagpanugyan man si Nogra sa publiko nga ipabilin gihapon ang pag-obserbar sa minimum health protocols bangud sa padayon nga ginapangatubang nga COVID-19 pandemic.
