Magamonitor ang Office of the Civil Defense – Negros Island Region sa sitwasyon sang pagboto sang mga Internally Displaced Families sa tagsa ka mga polling precincts sang mga ini sa Lunes, Mayo 12.
Ang mga botante nga mga yara sa evacuation center ang isakay sa mga salakyan kag butangan sang marking sang Commission on Elections (COMELEC) agud idul-ong sa ila tagsa ka mga eskwelahan sa ila nga mga barangay.
Gina-athag man nga ang mga eskwelahan kun sa diin magaboto ang mga ini ang wala malakip sa 6KM danger zone sang Bulkan Kanlaon.
Suno sa pahayag ni Office of the Civil Defense – Negros Island Region Director Donato Sermeno III.
Ginpahayag ni Sermeno magapadala sila sang ila personnel sa Regional Election Monitoring Action Center sa pag-monitor sang mangin dalagan sang eleksyon kaupod man nga magabantay ang mga personnel sang tagsa ka local Disaster Risk Reduction and Management Office.
Sa latest nga impormasyon nga nakuha sang OCD sa Philippine Institute of Volcanology and Seismology (PHIVOLCS) may narekord nga ash emission sa Bulkan Kanlaon sadtong adlaw sang Huwebes.
Ang OCD ang kabahin man sang on-line session meeting upod sa National Task Force Kanlaon nga ginhiwat sang Metro Manila kun sa diin wala sang pagbag-o sa ginpagwa nga panugyan ni PHIVOLCS director Dr. Teresito Bacolcol kag nagapabilin sa alert level 3 sa gihapon ang bulkan Kanlaon.
Nagpanawagan man ini sa tanan nga magkooperar ilabi na nga may sayluhon sa polling centers gikan sa evacuation centers kag indi magpasaway agud mangin matalunsay ang proseso sang piniliay.
