Naghingyo ang Office of the Ombudsman sa Sandiganbayan nga magpagwa sang precautionary hold departure order batok kanday Senator Francis “Chiz” Escudero kag negosyante nga si Maynard Ngu.
Sanday Escudero kag Ngu ang gina-imbestigaran sa gina-alegar plunder, graft kag indirect bribery may kaangtanan sa flood control scandal.
Gin-raffle ang request sa Sixth Division sang Sandiganbayan sang Sabado sang hapon.
Una na nga ginpahayag ni former Department of Public Works and Highways (DPWH) Undersecretary Roberto Bernardo nga ginpa-agi niya kay Ngu ang 20% ukon P160 million sang ginabanta P800 million sang inserted projects para sa Valenzuela sa General Appropriations Act. Suno kay Bernardo, para kay Escudero ang P160 million.
Ginlaragway ni Bernardo si Ngu nga “close friend” niya kag personal sia nga nagdul-ong sang kwarta sa opisina sini sa Manila.
Sa iya affidavit, ginpahayag ni Bernardo nga “close friend” man kag campaign contributor ni Escudero si Ngu.
Apang ginpanginwala ni Ngu ang alegasyon nga involved sia sa flood control kickbacks.
Ginpanginwala man ni Escudero ang kaangtanan sini sa ma-anomaliya nga flood control projects.
Sa iya statement, ginpahayag ni Escudero pasakaan sini sang kaso si Bernardo sa gintawag niya nga malisyoso nga mga alegasyon batok sa iya.
