Ginpaathag ni Office of the President Assistant Secretary Rea Uy Epistola nga wala sang kaangtanan sa Barangay and Sangguniang Kabataan Elections 2026 ang P200,000 nga ginpanagtag para sa 601 ka mga Barangay sa Negros Occidental nga magakadto sa Barangay Projects kag lima ka napilian nga scholars sa idalom sang Bawat Barangay Makikinabang (BBM) program sang Office of the President.
Madumduman nga ginpatigayon ang ceremonial payout sa Panaad Park and Stadium sang Biyernes nga ginpangunahan ni Cabinet Secretary Benhur Abalos Jr, samtang yara man si Sec. Epistola.
Luwas kay Negros Occidental Governor Eugenio Jose “Bong” Lacson, yara man ang mga opisyales sa Provincial Government, Barangay officials sa 601 ka Barangay sa probinsya, kag ang tig-lima ka mga napilian nga scholars sa kada Barangay.
Suno kay Epistola, ang programa ang wala sang ano man nga pamulitika kag wala ini sang kaangtanan sa BSKE.
Suno sa iya, kabahin ini sang padayon nga tikang sang gobyerno sa paghatag sang suporta sa mga komunidad kag sa edukasyon sang kabataan.
Ginpaathag man ni Epistola, may yara sang nagakaigo nga mga safeguards kag monitoring mechanisms ang Office of the President agud masiguro nga ang pondo magakadto lamang sa nagakadapat nga kadtuan.
