Padayon ang monitoring kag surveillance sang Office of the Provincial Veterinarian sang Negros Occidental agud maseguro nga malikawan ang pagsulod sang kaso sang African Swine Fever (ASF).
Sa interview sang Bombo Radyo Bacolod kay Negros Occidental Provincial Veterinarian Dr. Placida Lemana, sa karun wala sang kumpirmado nga kaso sang ASF sa probinsya.
Sila ang nagabulig man sa surveillance activities sa bulig sang mga lokal government units sa mga entry kag exit points partikular na sang mga pork kag pork products gikan sa mga lugar nga infected sang balatian.
Ini matapos sang liwat nga pagduging sang ASF sa Batangas.
Suno kay Lemana, ang anay mga red zones nga LGU bangod sa infection sang ASF nga ginalakipan sang Pulupandan, Hinigaran, Silay City kag Victorias City ang napanaog na sa pink zone ang status kag sa karun ginaproseso naman nila nga mangin pink zone ang San Carlos City, La Castellana kag Kabankalan City, Negros Occidental.
Nagapati si Lemana nga indi na masudlan sang ASF ang Negros Occidental kun nagasunod ang mga hog raisers sa recovery plan nga ginalakipan sang biosecurity measures.
Kalakip diri ang disinfection kag paghimo sang perimeter fence sa mga baboy samtang dapat man likawan ang spoil feeding ukon pagdamog sang gikan sa mga pagkaon sa balay-balay.
Ini bangod mahimo may mga karne sang baboy ukon pork products nga indi mapaktan nga nagikan sa mga infected areas.
Panawagan man sini nga likawan ang pagpasulod sang iban nga tawo sa tangkal kag seguruhon nga indi masudlan sang tubig sa tion sang baha ang tangkal bangod ang tubig-baha ang sarang magdala sang kagaw.
Pahanumdom man sa mga hog raisers nga kun nagalain ang pamatyag sang mga baboy, mas maayo nga ipatsekyar sa mga paravet, agud makuhaan sang samples kag mapadala sa laboratoryo nga makatumod kun ini ang infected sang ASF.
