Ginpahayag sang Office of the Vice President (OVP) nga ang mga biyahe sa nagkalain-lain nga mga pungsod ni Vice President Sara Duterte ang nakasunod sa mga layi kag regulasyon sang gobyerno sang Pilipinas.
Sa isa ka pahayag sang OVP, ang pagpadulong ni Duterte sa Kuwait sang Biyernes, Agosto 15, ang para sa isa ka pagtililipon sang Filipino community agud nga estoryahan ang mga issue kag mga concerns nga nakaapekto sa ila nga sektor.
Ginpanindugan man sang opisina sang bise presidente nga kabahin sang mandato sang Bise Presidente nga nagtiglawas kag magsulong sang ikaayo sang mga Pilipino, kalakip na ang mga yara sa iban nga pungsod, importante nga padayon siya nga makig-angot sa mga Filipino migrants sa bisan diin man nga bahin sang kalibutan.
Suno pa sa nasambit nga opisina ang biyahe ni Duterte ang pribado nga ginpondohan, kag wala sang may gingastos nagikan sa pondo sang gobyerno.
Ang pahayag ang nagaathag sa mga palamangkutanon sa pagbiyahe sang bise presidente kag ginapakigbahin ang importansya sang mga pagbisita sa mga Filipino communities sa iban nga pungsod bilang kabahin sang iya nga trabaho kag responsibilidad.
